बुंदेली गीत : बहू मिली है गुनवारी

कित्ती नौनी बनी आज जा,

मटर-भटा की तरकारी।

लगो बघार तेल सरसों का,

राई नॉन जीरे डारे।

लहसुन-प्याज डार के भूंजो,

तिल डारे कारे-कारे।

झौंके गरम करैया में फिर,

भटा-मटर बारी-बारी।

संसी सें फिर पकर करैया,

भटा-मसालो टारो खूब।

दो लोटा भर पानी डारो,

ढंकना ढांक उबालो खूब।

तरकारी की उड़ी महक तो,

नचन लगे लोटा-थाली।

चटकारे ले-ले के रोटी,

तरकारी सब घर खा रओ।

डुकरा ससुर आज तो खुस है,

भौत बहू के गन गा रओ।

सास सोई के रई है उनखो,

बहू मिली है गुनवारी।